Ел естімеген диагноз

Айсұлу ханым жиырма жылдан бері жалдамалы пәтерде тұрып келеді. Жиырма жыл бойы бір баспанадан екіншісіне көшіп, төрт баласын жеткізу үшін бар өмірін арнаған ана бүгінде жұмысқа да шыға алмайды. Себебі оның ерекше күтімді қажет ететін қызы – Медина бар.

Дәрігерлер Мединаға атрезия диагнозын қойған. Анасының айтуынша, мұндай диагноз өте сирек кездеседі.

Қызы өмірге келгеннен бері үш күрделі операцияны бастан өткерген. Бүгінде оның ішегіне қойылған арнайы құрылғы арқылы өмірлік маңызды қажеттілігі жүзеге асады. Бұл – үздіксіз күтімді, тазалықты және ананың тәулік бойы жанында болуын талап етеді.

Ең ауыры – осындай ерекше күтімді қажет ететін баламен тар пәтерде өмір сүру. Бір бөлмеде бірнеше бала бірге өсіп келеді. Балалардың емін жасауға, тынығып демалуына, еркін ойнап-күлуіне мүмкіндік аз.

Көп жылдан бері балалары үшін күресіп келе жатқан ананың көзіндегі жас бұл жолы қуаныштан төгілді. Ел болып бірігіп, жалғызбасты ана мен 4 балаға баспана сыйладық! Жиырма жыл бойы жалдамалы пәтерде өткен өмір артта қалды.

Енді бұл үйде балалардың күлкісі естіледі. Асүйде анасының мейірімімен дайындалған ыстық тағамның иісі аңқиды. Балалардың әрқайсысының өз бұрышы, өз арманы, өз болашағы бар.

Бұл қуанышта әрбір қазақтың үлесі бар! Тағы бір мұқтаж отбасын бірге баспанамен қуантайық!